Magasin i Mo i Rana

Nasjonalbiblioteket har fleire ulike magasin, tilpassa ulike materialtypar og behov. Sikringsmagasinet held 8 °C og det relative fuktinnhaldet i lufta er på 35%. Frysedelen held -5 °C.

Fjellmagasin 1

Det første sikringsmagasinet inni fjellet i Mo i Rana vart opna i 1992. Fjellet held ein konstant temperatur på 8 °C, så magasinet treng derfor inga oppvarming eller avkjøling. Det relative fuktinnhaldet i lufta er på 35%. Det første fjellmagasinet består av tradisjonell magasinlagring med rullereolar og faste hyllar og rommar omlag 40 000 hyllemeter med materiale.

Fjellmagasin 2 og 3

I 2023 vart fjellanlegget utvida med to nye magasin, inkludert ein frysedel, og dessutan nytt digitalt sikringsmagasin. Anlegget er utstyrt med inertluftanlegg som senkar oksygennivået for å forhindra brann.

Dei nye magasina er bygde som automatlager, der materialet blir bevart i stålkasser som automatisk blir henta ut og inn med kraner. Den største hallen tilhøyrer Nasjonalarkivet og har ein kapasitet tilsvarande omlag 70 000 hyllemeter. Det nye magasinet til Nasjonalbiblioteket rommar om lag 40 000 hyllemeter, inkludert ein frysedel for bevaring av den norske filmarven.

Tilsaman har fjellanlegget no ein kapasitet på om lag 150 000 hyllemeter.

Nitratfilmmagasin

I eige bygg utanfor fjellanlegget ligg nitratfilmmagasinet. Bygningen inneheld nitratfilm og fotonegativ på nitratbase. Materialet er svært brannfarleg, så konstruksjon og bygningsmateriale er valt av omsyn til brannvernet.

Automatlageret til depotbiblioteket

I tillegg til fjellanlegget har Nasjonalbiblioteket eit automatlager med fem robotkraner i samband med Depotbiblioteket, med ein kapasitet på 2,5 millionar publikasjonar for utlån til norske bibliotek.

Mellomlager til digitalisering – Autostore

Nasjonalbiblioteket har også ulike løysingar for mellomlagring av materiale som skal til digitalisering. I tillegg til heisautomatar blir eit Autostore-system brukt med 9000 kasser som blir styrte av 8 robotar.

Magasin i Oslo

Magasinet ved Nasjonalbiblioteket i Oslo er eit underjordisk magasin som har materiale fordelt på over 36 000 hyllemeter og meir enn 300 skap av ulike typar. Magasinet er i hovudsak eit bruksmagasin, det vil seie at materialet i magasinet kan brukast på lesesalane på Solli plass.

Filmklipp frå magasina: